رمضان شهر الملهيات

المفروض أن رمضان يكون شهر الصيام والقرآن والصلاة والطاعات ... لكن بعض الناس الله يهديهم بلشونا برمضان كل همهم انهم يلهون الناس عن طاعة الله وصار للأسف شهر رمضان شهر تكثر فيه الملهيات
الممثلين قبل رمضان بشهر وهم يشتغلون ليل ونهار عشان مسلسلات بايخه و واطيه يعرضونها علينا في رمضان ... مغازل ... ومخدرات ... وبراطم
القنوات الفضائية ماتحلى لهم المسابقات والمسلسلات وحصرياً ... إلا في رمضان ... مسلسلات الظهر والعصر وقبل الفطور وبعد الفطور وبعد التراويح ونص الليل وقبل السحور وبعد السحور ... يعني شوفوا جريدة الوطن اليوم شكاتبه بالخط العريض : الطوفان الدرامي قادم 115 مسلسلاً ... وتحته حاطة هالاحصائية لمسلسلات رمضان :
3 مسلسلات بدوية
12 مسلسل خليجي
20 مسلسل كويتي
28 مسلسل سوري
52 مسلسل مصري
الدورات الكروية الرمضانية ما تحلى إلا في رمضان يعني من العصر الى قبل المغرب ركض ورى هالكره والا تشجيع
الجرايد ما تنطبع مبجر الا برمضان من الساعة 10 واصلة البيت عندك ... صفحتين مسابقات ... وصفحتين جرايم .... وصفحتين روايات ومذكرات تنشر لأول مره ... لا وبعض الجرايد تطلع ملاحق سخيفه جنه صفحات الجريده موكافيه
الأسواق ماتنزل بضاعات جديدة الا بالعشر الأواخر ... وما تصير تنزيلات الا برمضان
الخيم الشيطانية ... اقصد الرمضانية ماتنصب الا برمضان
دورات الكوت بوسته والدامة ما تحلى الا برمضان
قعدة القهاوي ما تحلى إلا برمضان ... من بعد الفطور الى بعد الفجر هذره وشاي وشيشه

حرام عليكم جمعتوا كل الملاهي برمضان ... ليش بتشغلونا عن الطاعة وعن ذكر الله ... ادري بعض الناس بيقول اللي في قلبه الصلاة ما تطوفه ومحد طاقك على ايدك عشان تنشغل مع هالملهيات ... اقعد في المسجد واقرى قرآن وصل واذكر الله واحضر دروس ... هالكلام صح بس ترى مو كل الناس عزيمتهم قويه للطاعة ... أغلب الناس الله يرحم الحال يبون اللي يعينهم على الطاعه مو اللي يلهيهم عن الطاعه ... وحتى لو الواحد بخير وما تأثر فيه هالملهيات ...اكيد بتأثر في غيره وبعدين شي يقهر أن رمضان يكون مناسبه لكل فاسد وصايع ودايخ انه يخرب علينا فرحتنا برمضان ... الله يبلغنا رمضان ويعينا وياكم على طاعته ويكفينا شر شياطين الأنس وملاهيهم