حكم بوعزوز

بوعزوز هذا من اعز ربعي ... اخو دنيا مثل ما يقولون ... انا اعتبر بوعزوز حكيم ... لا مو حكيم الا نافورة حكم ... بس هاه ... مو 24 ساعة الحكم عند بو عزوز مرتبطه بالحاله المزاجية وهذا الزين فيه ... يعني اذا كان ذاك اليوم متغدي عدل ومقيل ... ولقيته بالليل اخذ حكم يغرد حكم ... من حكم بعزوز اللي عجبتني حكمه لها علاقة بالتعامل مع الناس ... وترى التعامل مع الناس فن والكلام مع الناس فن .... يقول بو عزوز (رضي الله عنه) اذا احد سألك عن شي شاريه حلو والا لا؟؟ .... يقول حبيبي بوعزوز : اذا كان شرى الشي اللي يسألك عنه وخلص قول له : " الله حلو ... الله يبارك لك فيه " حتى لو كان رايك الصجي غير لأن كلامك ماراح يغير شي بالعكس يمكن يضيق خلقه ... أما اذا كان للحين ما شراه اخذ راحتك وقول اللي تبي ... ليش عجبتني هالحكمة او النظرية العزوزية ؟ ... لأنه فيها مراعاه للجانب النفسي للناس ... ولأنه لكل حادثة حديث ... والله لا يحرمنا من حكم بوعزوز