تعرفت عليه ايام الدراسة في القاهرة وسكنا مع بعض في شقه وحدة . فعلا شخصية مميزة بكل معنى الكلمة مميز باخلاقة مميز بتواضعه رغم انه صاحب منصب كبير مميز بهدوئه و وقاره مميز ، بحبه للعلم ، ومميز باسلوبه في الكلام ، والغريب ان بيني وبينه توافق لدرجه كبيره بالافكار والاهتمامات ووجهات النظر في اغلب القضايا العامة اللي نتناقش فيها ، حتى الاكل ... نظامه قريب من نظامي صج هو بطيني اكثر مني شوي بس بشكل عام متقاربين نسيت اقول ان القاضي بحمود من اهل الامارات وهو سبب حبي للهجه الأماراتية لدرجة اني احاول احياناً اجاريه واقلده في بعض الكلمات التي تشدني في اللهجه الاماراتية مثل ...
ربيعي (رفيجي)
هيه (ايه)
ماشي (اذا على شي يعني مافيه ، واذا على شخص يعني مو هنيه)
ما يستوي (ما يصير)
بخبرك (بقولك)
فره (احذفه)
رمسه (سالفه)
عقه (قطه مو قطوه)
وغيرها من الكلمات مثل كلمة " ايواااااااا " يقولها باسلوب غريب جنه يقول صدتك او جنه قضب عليك شي .عموما سويت للقاضي بحمود تصميم بالفوتوشوب خلفيه للشاشه وشي عجيب حطيت فيه صورته وكتبت فيه كلمه كان يطفرني فيها ودي احطه تشوفونه باس ادري بيزعل بوحمود وبتصير فيها على قولة طارق العلي " هذي فيها قبايل" بصراحه كانت ايام حلوه وذكريات حلوه قضيتها مع القاضي بوحمّود عسى ربي يوفقه ويسعده دنيا وآخره
ليست هناك تعليقات:
إرسال تعليق