ابداع ... على الطاير

اختبار (المترتبات) من الاختبارات المستخدمة في قياس الابداع ... وفكرته بسيطه جدا وممتعة جداً ، يعطيك مساله افتراضيه ويقولك ماذا يترتب على هذه المسأله لو حدثت ... يعني اذا صارت المسأله اللي في الأختبار تتوقع شنو يصير من تغيرات ... طبعا الاختبار يقيس قدرتين أو مهارتين من مهارات الابداع هم الطلاقة والأصالة
الطلاقة يعني كم اجابة تقدر تجاوب في الوقت المحدد وغالبا كل سؤال وقته دقيقتين بس...وعلى شرط تكون الأفكار أو الاجابات المقبولة صادرة عن وعي ...يعني مو حي الله فكره أو اجابة ... والأصالة يعني الأفكار أو الأجابات المميزة واللي يقل تكرارها ... يعني مو كل واحد يوصل لها ... يعني متعوب عليها
طريقة التقييم بعد ما تجاوب تعد اجاباتك ... وكل اجابه صحيحه تاخذ عليها درجة طبعا اذا كانت اجابة مقبولة ...وإذا اذا كانت الاجابة أصيلة (يعني متعوب عليها) تاخذ درجتين ... بعطيكم ثلاث مسأئل كل واحد يختار مسأله وحده ويختبر نفسه خلال دقيقتين ويشوف مستواه ، طبعا مافيه رقم معين يدل على الابداع او عدم الابداع ، بس من خبرتي البسـيطه أقول اللي تكون درجته بين 8 و 10 خلال دقيقتين ...يعتبر نفسه (مو بعيد عن الإبداع) ويا ليت يكتب لي اجاباته ودي اشوفها...عموماً هذي هي المسائل وشدوا حيلكم
1- مالذي سيحدث لو صدر قرار بمنع النساء من العمل نهائيا
2- ما الذي سيحدث لو اصبح الناس لا يتكلمون بألسنتهم لكن بالاشارة
3- ما الذي سيحدث لو اصبحت الحيوانات هي وسيلة التنقل الوحيدة