2009/06/28

منو يبي المجلس ؟ ... ومنو ما يبيه ؟


كثر الكلام هالأيام عن وجود حمله منظمة ومشتركة لتنفير الناس من مجلس الأمه وتكريه الناس فيه واذا طنشنا البروبوقندا اللي مشتغله عدل واللي هي في النهاية "شنشنة نعرفها من اخزم" ... نقدر نعرف منو اللي يبي المجلس ومنو اللي ما يبيه بطريقة بسيطة ومباشرة و واقعية ... شوفوا يا جماعة الخير اللي يبي المجلس هو الانسان البسيط اللي ما عنده واسطه الا أعضاء دائرته ... واللي ما يبي المجلس الانسان الواااصل مو بس هو اللي واصل الا حقه يوصله عن طريق (home delivery) وفوقه بوستين بعد ... اللي يبي المجلس الانسان اللي ماعنده جريده ولا هو من جماعة راعي الجريده ولا رايه مثل راي راعي الجريدة ... واللي ما يبي المجلس راعي الجريدة وجماعته ومن يعز عليه وما يخالف رايه ... اللي يبي المجلس الانسان اللي يقهره فلوس الديره تتراقص ذات اليمين وذات الشمال على انغام المناقصات الوهمية والسفرات السياحية.... واللي مايبي المجلس اللي شغله ماشي من مناقصه الى مناقصه "والحسابه بتحسب" بس مجلس الأمه غير حسبتها ... اللي يبي المجلس الأنسان اللي يتطبق عليه القانون من راسه الى اخمص قدميه ... واللي ما يبي المجلس الانسان اللي ما يعرفه القانون ولا يدل بيتهم ... اللي يبي المجلس الانسان اللي مطالبة علاج له ولعياله او دراسة عياله ونجاحهم او وصول الكهربا او اسقاط قرض او تعديل شارع او مترين يحط فيهم شبرة للسايق ... واللي مايبي المجلس اللي مطالبة مناقصه بالملايين والا منصب وزاري والا قطعة ارض مساحتها مليون متر مربع بس ... اللي يبي المجلس الانسان اللي ما ينفتح له مكتب الوزير الا ومعاه عضو ... واللي ما يبي المجلس الانسان اللي الوزير مطيح معاه بالشاليه والا بالديوانيه ... ندري ان المجلس مو (perfect) وان له شطحات ونطحات وان اداءه متقلب مثل جونا بالكويت لكن راضيييين فيه ونبيييه ... نبي مجلس الأمه ... اتوقع على قولة بو عيده صوتنا وصل ... صوتنا وصل

ليست هناك تعليقات:

إرسال تعليق