2009/09/06

بوسة لوزارة التربية


اليوم بدء دوام المدرسين و المدرسات في مدارسهم وتقديرات الوزارة تشير الى ان عددهم هو 50 الف معلم ومعلمه وتوجيهات الوزارة تدعو الى عدم التقبيل " بوس ممنوع " أو العناق ... طبعاً في نظر وزارة التربية الموقرة الحل لمشكلة عدوى انفلونزا الخنازير سهل جداً وبسيط جداً " على البراد " ممنوع بوس ... وبس
زين لو قلنا ان كل معلم او معلمة باس بوسه وحده بس ... يعني اليوم بس " انتجت " مدارس وزارة التربية 50 الف بوسه مزدوجة وإن شئت فقل 100 الف بوسه مفردة لان البوسة مركب مزدوج من بوستين وحده على الخد اليمين والثانية على الخد الشمال ... تتوقعون هالتقديرات واقعية ؟؟؟ .... رأيي الشخصي ان هالعدد " ولا شي " امام الواقع الفعلي
اليوم داومت بمدرستي حالي حال باقي المدرسين " الغلابه " وتلقيت ما يقارب 30 بوسه مزدوجه وإن شئت فقل 60 بوسه مفردة ... والبارح كنت بدوانية تلقيت ما يقارب من 20 بوسه مزدوجة وان شئت فقل 40 بوسه مفردة يعني في يوم وليله ما يقارب من 50 بوسه مزدوجة وان شئت فقل 100 بوسه مفردة ... " طبعاً المره تطق على راسها وتقول محد بيودرنا الا انت " ... المهم نرجع لموضوع ( البوس المدرسي ) لو فرضنا ان متوسط البوس " المنتج " اليوم في مدراس وزارة التربية هو 20 بوسه مدرسية مزدوجه وان شئت فقل 40 بوسه مدرسية مفردة لكل مدرس أو مدرسة ولو ضربنا هالعدد ب 50 الف وهو عدد المدرسين والمدرسات في البلد فإن حصيلة البوس المدرسي " المنتج " في مدارس وزارة التربية هو 1000000 (مليون ) بوسة مزدوجة وإن شئت فقل 2000000 (مليونين) بوسة مفردة في يوم واحد بس .... لا ويبون المرض ما ينتشر بعد !!! ودام السالفة خربانه خربانه والبوس شغال " على ودنه " ودي اختم هالمقالة ببوسة لوزارة التربية ... يستاهلون

هناك 8 تعليقات:

  1. الاحصائية خطيره
    مليون بوسة مزدوجة في اليوم الواحد
    الله يرأف بحالنا
    قبل ايام كنت بالمقبرة وكانت هناك لافته
    مكتوب عليه احذر العناق والتقبيل
    فقلت هل نعزي اهل المتوفى باللاسلكي ؟

    وتستاهل وزارة التربية بوسة
    ان شاء الله تحصل بوسه من كل انسان
    لعل وعسى تصاب بالانفلوزنا

    شكراً ..

    ردحذف
  2. لا بس الصورة عجيبة !!!
    وين حصلتها ... مزاين دير الزور !

    ردحذف
  3. بوس * بوس
    الله يحفظ اعيالنا واعيال المسلمين

    ردحذف
  4. انا اقترح ان كل واحد يبوس راس الثاني و تصير خاصية كويتية
    يعني اهل الامارات معروفين بحب الخشوم لكل الاعمار من صغير لصغير و من كبير لكبير
    خلنا بالكويت نطلع فنتق جديد
    كل واحد يحب راس الثاني
    بس اخيرا طخت وزارة التربية

    ردحذف
  5. نمووول

    الناس متوكله على الله ومو دايره بال " فالله خير حافظاً وهو ارحم الراحمين " ... والا الوزاره ما عليها تكلان

    شكراً على المرور وعسى ربي يوفقك لكل خير

    ردحذف
  6. بو حمووووود

    الناس مشغوله بالانفلونزا وانت مشغول بالمزاين يا زين الشباب

    روح عسى ربي يوفقك وتطلع سيارتك من الكراج بالسلامة

    ردحذف
  7. الكلداري

    حياك الله وحيا الله أهل قطر

    شرفني مرورك وعسى ربي يوفقك لكل خير

    ردحذف
  8. ابو وليد

    شرفني مرورك يالغالي
    انا أول واحد يوافق على اقتراحك

    اسعدني مرورك وعسى ربي يوفقك لكل خير

    ردحذف