2009/09/24

مرجعية البطيخ


" ديرة بطيخ "
هالعبارة عليها دوس هالأيام الكل يستخدمها طبعاً ما ابي اتكلم عن قصة هالعبارة وليش انقالت لكن ابي اعرف شي واحد " ديرة بطيخ " بالنسبة لشنو أو بالنسبة لمنو أو مقارنة مع منو ؟؟؟


اذا السالفة سالفة تجاوز القوانين فتجاوز القوانين في كل دولة والمحاكم تشهد فحالنا حال الكثيرين صج فيه دول اقل منا في تجاوز القوانين لكن اكيد فيه دول ناسفين القوانين
وأذ السالفة سالفة بوق فالبوق بكل مكان من طوكيو الى نيويورك وانت ماشي صج بعض بوقاتنا بالهبل بس اكيد فيه دول بوقاتنا تطلع خرده عند بوقاتهم
واذا السالفة سالفة ضعف ادارة ... صح عندنا ادارة ضعيفة في بعض الوزارات والادارات لكن فيه دول موليه بالادارة
واذا السالفة سالفة واسطات فالواسطات بكل مكان ... والشفاعة (يعني الواسطة) مطلوبة ومأجورين عليها اذا ما فيها ظلم لأحد ... صج صارت بعض الوظايف والمعاملات بالواسطة لكن فيه دول الكهربا والماي والعلاج الاساسي بالواسطة والبخشيش
واذا السالفة مقارنة بالماضي فكلنا ندري ان الأول تحول وان التحلطم وارثينه من الناس اللي قبلنا ... وان ارضاء الناس غاية لا تدرك أول والحين

الزبدة حتى نرتاح نقيس حالنا بمنو ؟؟؟؟ والا بشنو ؟؟؟؟ عشان نعرف ديرتنا ديرة بطيخ والا ديرة حنظل ... احد يقدر يقول ؟؟؟
انا ما اقول كل شي تمام ... ولا أقول احنا احسن ناس ... ولا اقول نسكت عن الغلط ... ولا اقول ما نطور انفسنا ونتحدى ذاتنا ... بس انا اقول ان المسأله نسبيه يعني " وعين الرضا عن كل عيب كليلة كما ان عين السخط تبدي المساؤي " يعني ممكن نكون زينين وحلوين لو قارنا انفسنا باللي علي يمينا ويمكن نكون رايحين فيها لو قارنا انفسنا باللي على شمالنا ... زين ليش ما نكون من اصحاب اليمين ومثل " ما يقولون اليمين درب الغانمين " ... مجرد سؤال عشان نفهم ... واذا تبون الصج عشان نتفائل بعد ... وعسى ديرتنا تتطور وتصير ديرة فراولة .

وجهة نظر "ولكل وجهة هو موليها"



هناك 15 تعليقًا:

  1. و ليش نكون ديرة بطيخ

    ردحذف
  2. هلا يا بو وليد
    والله ودنا نصير ديرة عسل ولوز وفراولة
    بس بالمقارنه بمنو؟؟ او باي معيار لمنو ؟؟
    ترى ما فيه احد راضي 100% عن ديرته
    طبعاً هذا ما يعني السكوت عن الاخطاء والرضا بالتجاوزات لكن يعني ان المثالية أو حتى شبه المثالية مالها وجود في ارض الواقع وفي بلاد الدنيا من اقصاها الى اقصاها

    وفي كل الاحوال شرفني مرورك
    وعسى ربي يوفقك لكل خير

    ردحذف
  3. " حتى نرتاح نقيس حالنا بمنو ؟؟؟؟ والا بشنو ؟؟؟؟ "

    قبل ما نقيس بغيرنا، علينا ان نحدد أهدافنا، و بالتالي بناء عليها نقيس هل حققناها مثل ما حققت البلدان الاخرى أهدافها أم لا ؟

    المقارنة مع الأسوء، غير صحيحة .. دولة بامكانيات الكويت من غير المعقول اقارنها بسوريا او مصر او تونس! اللازم اقارنها بدول تناسبها اقلاً دبي اللي يمنا!

    أما اهدافنا: فهذا الدستور جدامك، كم هي نسبة تطبيقه على أرض الواقع؟

    غير خطابات الحكومة طـول 48 سنة ..!! و غيرها العشرات من الكتابات اللي صاغت اهداف و مخططات، كانت صرحا من خيال فهوى!

    ردحذف
  4. مقارنة فائض الميزانية اللي عندنا المفروض ما نشوف هالبلاوي بالديرة ( المستشفيات التعبانة + المجاري + الكهربا .... الخ )

    مشكلتنا بالديرة تتلخص بغياب الإخلاص " الاتقان " و غياب الأمانة

    و الحمدلله على كل حال

    ردحذف
  5. Safeed

    حياك الله يا اخي
    "علينا ان نحدد أهدافنا، و بالتالي بناء عليها نقيس هل حققناها مثل ما حققت البلدان الاخرى أهدافها أم لا ؟"

    "أما اهدافنا: فهذا الدستور جدامك، كم هي نسبة تطبيقه على أرض الواقع؟"

    وجهة نظر منطقية ومقياس يمكن تطبيقه ... اتفق معاك
    مع ان هذا الامر يجرنا لسؤال آخر وهو هل اهدفنا فقط تطبيق الدستور ؟؟؟

    عسى ربي يوفقك لكل خير

    ردحذف
  6. الـسـنـبـلـة

    المشكلة مافيه مقياس يجمع عليه الكل للمقارنة او قياس تطور البلد

    هل الدستور مثل ما قال اخوي Safeed
    او فائض الميزانية مثل ما قلتي انتي
    والا الاشياء اللي بيقولونها باقي الاخوان
    والا كل هالاشياء مع بعض

    مره ثالثة هالمقال ماهو تبرير للإخطاء والتجاوزات اللي كلنا نشوفها ... واكيد كلنا نقول انا مانبي نصير ملائكة ومثاليين بس نبي نتفق على مقياس يرضي الأغلبية...هل هو الدستور مثل ما قال Safeed والا حتى بتفسير الدستور وفهمه بنختلف مثل ما هو حاصل كلن يفسر الدستور ومدى تطبيقه على مزاجه ومصلحته وفهمه

    ومثل ما قلتي الحمد لله على كل حال
    وعسى ربي يوفقج لكل خير

    ردحذف
  7. ياخوي يا السميّ

    القياس يكون في اشياء متشابهه نوعا ما

    يعني الكويت نقيسها
    بدول الخليج
    نفس الاقتصاد
    نفس الحكم
    نفس الموارد
    نفس التفكير
    نفس الدين

    اما بنقيس نفسنا بجيبوتي ونقول احنا بخير لا بالله!!!

    ردحذف
  8. اخوي خالف تعرف

    هلا يالسمي

    حلو اترك عنك جيبوتي ومدغشقر وخلنا نقارن ديرتنا بباقي دول الخليج شراح نلقى ؟؟؟ راح نقلى فيه دول احسن منا وفيه دول احنا احسن منها هذا بشكل عام ، بشكل خاص فيه دول احسن منا بجوانب ونفس الدول احنا احسن منها بجوانب ... يعني حالنا مثل حال دول الخليج ... هل هذا يعني ان بطيخنا واحد ... على وزن خليجنا واحد ... هل دول الخليج دول بطيخ ؟؟؟

    اسعدني مرورك يالغالي واشكرك على المشاركة في الموضوع

    وعسى ربي يوفقك لكل خير

    ردحذف
  9. يمكن أوضاع الديره من سيء الي اسوء

    ويمكن يت هالكلمه على الساني

    اذا كنا بنقارن روحنا مع اللي حولنا راح نتعب وايد

    واذا راح نقارن روحنا بين قبل والحين هم راح نتعب وايد

    لازم نعدل اوضاعنا ونفكر بمستقبل هالديره اكثر

    والحمدلله ربكم يبي يختبرنا وانشالله هالجم قرصه اللي انقرصناها راح تكون انطلاقه نحو الأفضل

    يعطيك العافية

    ردحذف
  10. الأخ الفاضل :: محمد ::

    "ديرة بطيخ"
    إن كان المقصد من هذه العبارة الإصلاح فأظن أن باغيها أخطأ طريقها ..
    ولا أرى من هذه العبارة إلا رائحة السخرية والتهكم ..
    وقد يتهكم المرء أحيانًا بمن يحب ليرقى به ..
    قد .. ونحسن الظن ..

    تحياتي

    بس البطيخة اللي في الصورة من وين جايبينها :)

    ردحذف
  11. اممم

    الحياه كلها صارت بطيخ!

    ردحذف