2009/08/16

رمضان شهر الملهيات


المفروض أن رمضان يكون شهر الصيام والقرآن والصلاة والطاعات ... لكن بعض الناس الله يهديهم بلشونا برمضان كل همهم انهم يلهون الناس عن طاعة الله وصار للأسف شهر رمضان شهر تكثر فيه الملهيات
الممثلين قبل رمضان بشهر وهم يشتغلون ليل ونهار عشان مسلسلات بايخه و واطيه يعرضونها علينا في رمضان ... مغازل ... ومخدرات ... وبراطم
القنوات الفضائية ماتحلى لهم المسابقات والمسلسلات وحصرياً ... إلا في رمضان ... مسلسلات الظهر والعصر وقبل الفطور وبعد الفطور وبعد التراويح ونص الليل وقبل السحور وبعد السحور ... يعني شوفوا جريدة الوطن اليوم شكاتبه بالخط العريض : الطوفان الدرامي قادم 115 مسلسلاً ... وتحته حاطة هالاحصائية لمسلسلات رمضان :
3 مسلسلات بدوية
12 مسلسل خليجي
20 مسلسل كويتي
28 مسلسل سوري
52 مسلسل مصري
الدورات الكروية الرمضانية ما تحلى إلا في رمضان يعني من العصر الى قبل المغرب ركض ورى هالكره والا تشجيع
الجرايد ما تنطبع مبجر الا برمضان من الساعة 10 واصلة البيت عندك ... صفحتين مسابقات ... وصفحتين جرايم .... وصفحتين روايات ومذكرات تنشر لأول مره ... لا وبعض الجرايد تطلع ملاحق سخيفه جنه صفحات الجريده موكافيه
الأسواق ماتنزل بضاعات جديدة الا بالعشر الأواخر ... وما تصير تنزيلات الا برمضان
الخيم الشيطانية ... اقصد الرمضانية ماتنصب الا برمضان
دورات الكوت بوسته والدامة ما تحلى الا برمضان
قعدة القهاوي ما تحلى إلا برمضان ... من بعد الفطور الى بعد الفجر هذره وشاي وشيشه

حرام عليكم جمعتوا كل الملاهي برمضان ... ليش بتشغلونا عن الطاعة وعن ذكر الله ... ادري بعض الناس بيقول اللي في قلبه الصلاة ما تطوفه ومحد طاقك على ايدك عشان تنشغل مع هالملهيات ... اقعد في المسجد واقرى قرآن وصل واذكر الله واحضر دروس ... هالكلام صح بس ترى مو كل الناس عزيمتهم قويه للطاعة ... أغلب الناس الله يرحم الحال يبون اللي يعينهم على الطاعه مو اللي يلهيهم عن الطاعه ... وحتى لو الواحد بخير وما تأثر فيه هالملهيات ...اكيد بتأثر في غيره وبعدين شي يقهر أن رمضان يكون مناسبه لكل فاسد وصايع ودايخ انه يخرب علينا فرحتنا برمضان ... الله يبلغنا رمضان ويعينا وياكم على طاعته ويكفينا شر شياطين الأنس وملاهيهم

هناك 6 تعليقات:

  1. اخوي ذكرتني بسنه من السنين يوم كنت ما اطوف شي من مسلسلات رمضان
    كنت كل شي آطالعه بدون مبالغه كنت اسهر الليل عشان اطالع اعادة الأشياء الي طافتني
    كل همي كان التلفزيون وشبصير باجر
    وكنت من الي يلعبون دوري كوت بو سته وهند

    بآول يوم العيد الناس يقولولي عيدج مبارك وتقبل الله طاعتج
    من اسمع تقبل الله طاعتج احس باحساس غريب
    اي طاعه وانا ما ستغليته بشي يرضي ربي غير الصيام والصلاة
    وقررت من يومها يكون رمضان عندي طاعة Xطاعة

    وعسى الله يفكنا من شرهم يا معود ويعينا على طاعته
    ويهدي الجميع

    ردحذف
  2. تصدق و تامن بالله اخوي محمد ان صارلي مده ما اتابع المسلسلات برمضان
    وصلنا الى مرحلة الاسفاف

    ردحذف
  3. ayo0oh

    والله كلنا مقصرين عسى ربي يعينا على انفسنا
    عسى ربي يثبتج ويوفقج لكل خير

    ردحذف
  4. Enter-Q8

    يا خوفي انا تعدينا مرحلة الاسفاف
    المشكلة ان هالمسلسلات رغم انحطاطها قادرة تفرض نفسها في كل بيت ... لافيه معايير ولا ضوابط رسمية ... ولاالناس قادرين (أو ما يبون) يتحكمون في عرض هالمسلسلات في بيوتهم

    عسى ربي يوفقك لكل خير

    ردحذف
  5. الأخ الفاضل :: محمد ::
    صباح الخير أخوي محمد ..

    الطوفان الدرامي قادم ..
    أشكرك على هذه الإحصائية ..
    أنا من رأيي أننا نحتاج إلى طوفان آخر دعوي وتوعوي يواجه الطوفان السخافي ..
    وما موضوعك يا أخي إلا خطوة جادة وإيجابية
    في سبيل الإنكار والتغيير للأفضل ..

    رمضان مبارك
    وكل عام وأنت إلى الله أقرب

    ردحذف
  6. أخوي محمد

    صبحك الله بالخيرات والمسرات ... صدقت نحن بحاجة الى برامج دعوية وتوعوية لمواجهة طوفان السخافة ... الشي المبشر اننا نرى بوادر هذه البرامج الدعوية والتوعوية ... وتبقى مجاهدة النفس والإقبال على الطاعة ... اسأل الله أن يعينني واياك والمسلمين على طاعته

    وعسى ربي يوفقك لكل خير

    ردحذف