2009/08/12

شقة للإيجــــــار ...FOR RENT


علاقتنا في الكويت مع الشقق السكنية تعتبر مؤشر على التغيرات الإجتماعية والاقتصادية في البلد ... قبل ماكان أحد يحب الشقق ولا يرتاح فيها كان أغلب الناس يسكنون في بيوت لما كانت النفوس غير النفوس والناس غير الناس ... ونادراً ما تلقى كويتي ساكن بشقه ... اغلب سكان الشقق كانوا وافدين عـــرب و غيرهم ... وبعدين لم تغير الزمن وتغيرت نفوس الناس وصار محد يستحمل احد وكانت الشقق رخيصه قام بعض الكويتيين يسكنون الشقق عشان الواحد يوسع على نفسه وعلى أهله ... والحكومة بعد ما قصرت استغلت حاجة الناس للسكن ودبستهم بشقق الصوابر ... بعد الغزو فضت اغلب شقق وعمارات الديرة لما طلعوا الفلسطينيين وغيرهم من العرب ... توهقوا التجار وفزعت لهم الحكومة... وحنا صرنا الضحية ... يعني مالك أمل يطلع لك بيت إلا لما يصيرون عيالك طولك ... يعني وانت تخلص اوراق التقاعد على طريجك خلص اوراق الكهربا للبيت اللي تذلك فيه الحكومة على ما يحصل ... الملاحظ في السنوات الأخيرة أن ثلاثة أرباع القسائم اللي تنبنى يكون فيها شقق للإيجار هالظاهره أكيد تدل على تغيرات اجتماعية واقتصادية في البلد ... ليش كثرة هالشقق في السكن الخاص لدرجة ان بعض المناطق مثل منطقة سلوى صارت معروفة كلها أجار ... تلقى البيت من أوله لأخره كله شقق للأجار ... أغلب المناطق اللي تنبنى خلال السنوات الاخيرة ثلاث ارباع قسايمها " الدور الثالث شقتين للأجار" ... ليش ؟؟؟ هل لأن صاحب البيت يبي يأمن سكن لعياله لأن يوم الحكومه بسنه وسنتها بعشرين سنه ؟؟؟ وإلا لأن الدنيا غلت والمعاش يالله يكفي ؟؟؟ والا مصدر دخل ثاني مريح ؟؟؟ هل كثرة الشقق راح تأثر على مشاريع التجار السكنية ؟؟؟ وهل التجار راح يضغطون على الحكومة عشان يطلع قانون للحد من بناء الشقق ؟؟؟ وهل راح تطول فترة تخصص السكن ... يعني ما توصل الكهريا للقسيمة الإ مع شهادة الوفاة ؟؟؟

هناك 5 تعليقات:

  1. كل الاسباب اللي ذكرتها..صحيحة
    توفير سكن و زيادة مدخول


    اما الحكوم نايمة بالعسل اخو شي فداويتها ياكلون!!

    تسلم على البوست

    ردحذف
  2. على طاري الظاهرة صدقت ..

    عندنا خوش قسيمة في صباح السالم بنيناها وتعبنا عليها وكانت مشروع سكن ولكن تفاجئنا إن عمارات تنبني أمام هالمنطقة السكنية! صار الوضع جنك في حولي والسالمية .. مايصير بيوت وقبالهم عمارات, نبي شوية تخطيط

    شاكرلك عزيزي

    ردحذف
  3. اخوي خالف تعرف

    ياخوفي لا يكون شعار المسؤولين
    "ما فاز إلا النوّمُ"

    عسى ربي يوفقك لكل خير

    ردحذف
  4. أخوي

    هذي ضريبة الموقع الممتاز
    الله يبارك لكم في قسيمتكم ويرزقكم الجيران الطيبين

    وعسى ربي يوفقك لكل خير

    ردحذف
  5. بعض الملاحظات الهامة علي العقارات :


    1 – الشقة الواسعة تمثل رفاهية معيشية لصاحبها فعلي سبيل المثال ( 3 غرف وصالة واسعة وحمامان ومطبخ ) كما انة اذا عرضها للإيجار او للبيع فإنة سوف يحصل علي قيمة مالية مرتفعة .

    2 – الطابق الثالث من الأدوار المفضلة لدي الكثير لا هو القريب من ضوضاء وغبار الشارع ولا هو بالمرتفع الذي يكون من الصعب الطلوع الية والنزول منة في حالة عطل المِصعَد ( الأسانسير ) او انقطاع الكهرباء عنة .

    3 – العقارات المرخصة يشعر المُشتري فيها بالأمان لكنها قليلة كما انها غالباً ستكون غالية الثمن .

    4 – من الأمور المميزة للعقار ( المِصعَد " الأسانسير " / الواجهة المعمارية / المدخل الواسع المزخرف / السلالم الواسعة ) لأنها تعطي راحة نفسية لصاحبها كما انها واجهة مشرفة لة امام ضيوفة .

    اذهب لغة انجليزية من اجلك

    ردحذف