مدونة محمد

2009/07/06

سجدة... بالفوتوشوب

تصميم من اعمالي على الفوتوشوب ... قديم شوي ... لكن حبيت اعرضه في المدونه ... أتمنى يعجبكم

عدد الطلبة الكويتين (طلبة وطالبات) اللي يدرسون في مصر بين 13000 الى 16000 بما فيهم طلبة الماجستير والدكتوراه ... خلونا نقول 13000 ... يصرف الطالب الكويتي سنويا رسوم دراسه وتذاكر وسكن وتنقلات وغيره بين 2000 الى 3000 (بالدينار طبعاً) خلونا نقول 2000 يعني بالسنه الوحده يدفعون عيال الكويت 26 مليون دينار هذا غير اللي يصـــرفه الطلبه الكويتيين في الأردن والبحــرين ولبنان وما ادري وين بعد يعني اللي يدفعونه عيالنا في 5 سنين ما يبني لنا جامعه ؟؟؟ ترى الحسبه كلها تقريبا ... يعني يمكن اقل شوي يمكن اكثر شوي ما تفرق ... بس حرام هالفلوس تطلع برى الديره ديرتنا أولى ... سوو لنا جامعه بفلوسنا .... ممكن ؟؟؟

2009/07/05

كتاب ... عجييييييب

بعض الناس اذا يبي يعرض كتاب عجبه في مدونته يحط روايه أو كتاب اجنبي ... كيفه ... لكن الناس فيما يشتهون مذاهب ... وانا مذهبي عربي احب الكتب العربية ... واليوم ودي اعرفكم بكتاب رائع من اروع الكتب بمكتبتي ... كتاب شيق وممتع في مواضيعه ...اسمه مفتاح دار السعاده ... مؤلفه هو الامام ابن القيم ... بس بصراحه كتاب ممتع يعني اذا بتعرف ليش الفيل ماله رقبه ، شنو فائدة الرموش للإنسان ، وشنو فائدة الأظافر ... ليش الحيوانات ملونه ، شنو اسرار النحل ... ليش الله خلق الريح وشنو فوائدها ، شنو فوائد الحرارة ، ليش النباتات ما تطلع ثمارها في وقت واحد يعني كل فصل تطلع ثمار نباتات معينة وشنو فوائد أوراق الشجار ، شنو فائدة كل جزء من اجزاء النخلة ، ليش صغار الحيوانات تكبر بسرعة ... وغيرها من المواضيع الحلوه ... اقروا هالكتاب ... والكتاب ترى ينباع بمكتبة جرير الحلو في هالكتاب انه يربط كل شي في هالدنيا بعظمة الخالق وحكمته ... تصدقون !!! .... يمكن ما تصدقون ان الكاتب ذكر اكثر من 30 فائدة وحكمة في خروج آدم من الجنه ... شي عجيب .... الصراحه راح تحس بالفائده والاثاره والمتعه والسعاده ... وانت تقرى مفتاح دار السعادة

2009/07/04

مثل ... ومعنى

كلنا نستخد الأمثال لما نتكلم وهذا شي حلو ... لكن الاحلى لما تعرف قصة المثل أو معناه ... طبعاً بعض الأمثال واضح في معناه أو قصته مشهوره أو ماله قصه أصلا لكن بعضها يكون له قصه ... وبعضها الناس يستخدمونه بس ما يعرفون معناه ... ومن الأمثال اللي يستخدمها بعض الناس لكن ما يعرفون معناه هالمثل (ضرب أخماس بأسداس) لما تسأل بعض الناس ...يعنو شنو ضرب اخماس باسداس يصفقون ايدهم اليمين بايدهم الشمال .... طبعا اخماس ممكن تكون مقبوله الاصابع الخمس باليد ... ممكن .... طيب الأسداس شنو ؟؟؟... حاولت اعرف يعني شنو هالمثل لين ربك يسرها وطحت على معنى المثل بكتاب عجيب ورائع بقولكم عن اسم الكتاب وموضوعه باجر اذا الله كتبنا من الحيين ... المهم طلع شنو معنى ضرب اخماس باسداس ؟؟؟ ... شوفوا يا الطيبين ... الأخماس يعني حواس الإنسان الخمس ... زين والأسداس ؟؟؟ الأسداس هي الجهات الست !!! ... يمين وشمال وشرق وغرب ... زين هذي الجهات المعروفه وهي اربع مو ست طيب ضيفوا عليهم جهتين هم فوق وتحت صاروا ست ... هذي الأخماس وهذي الأسداس ...ومعنى المثل يضرب للإنسان (المتوهق) اللي يبذل كل جهده وطاقته بحواسه الخمس ... في كل جهه من الجهات الست ... يعني السالفة مالها علاقه بصفق الايد اليمين بالايد الشمال

2009/07/03

من سوالف الديوانية

الربع بالدوانية يشرقون ويغربون بسوالفهم ... تقريباً ما يخلون شي الا يسولفون فيه ... صحيح اكثر السوالف سياسية لأن مجلسنا قوي وحامي والجلسات منقوله بالتلفزيون ... لكن ما يمنع ان نتكلم بكل شي ... ومرات السوالف والنقاش يكون جماعي ومرات كل اثنين أو ثلاثه يتكلمون عن موضوع بروحهم ... المهم ... ليله من الليالي واحد من الربع طرح موضوع ... الحقيقة واقعي وشد الكل وقاموا يسولفون فيه وكل واحد يطرح وجهة نظره ... الموضوع باختصار هو : هل تسمح لزوجتك انها تفتح تيلفونك وتقرى مسجاتك ؟؟؟ ... طبعاً الربع انقسموا لفريقين .... الفريق الأول يقول : ما بقى الا هذي بعد ... ليش تقرى المسجات ... وليش التجسس؟ ... وين الثقة؟ ... وما احب انه تصير العلاقة بينا تجسس انا اقرى رسايلها وهي تقرى رسايلي ... وصج هي زوجتي بس لازم يكون لي قدر من الخصوصية... هذا خلاصة الراي الأول في الدوانية.... الراي الثاني يقول ... عادي ... خلها تقرى لين تقول بس شفيها ؟ ... وليش هالحساسية ؟ ... ولا تبوق لا تخاف ... وترى طبيعة المره أنها شكاكه وفضوليه خلها مو تقرى المسجات بس الا تقرى كتلوج التيلفون بعد ... لأن بعض (عض لسانك حيل وانت تقول بعض) الحريم اذا حست ان زوجها يمنعها من فتح التيلفون تشك اكثر ... فعادي ، تيكت ايزي ... الحقيقة كان النقاش حلو طولنا فيه لين طاح العشا ...وطبعاً العشا هو احلى سالفه في سوالف الدوانية

2009/07/02

طرح الليبراليين ... غير أخلاقي

الوصف العام والمجمل لأي طرح يتداول في الساحة لا يحتاج لكثير جهد ...يكفي أن تعرف المواضيع التي يتناولها الطرح فتصف ذلك الطرح وفقا لنوعية المواضيع التي يحتويها... والمتابع لما تطرحه الالة الأعلامية الليبرالية باطيافها المتنوعة وما يطرحه رموزها البرلمانيون يلاحظ بكل بساطه ( وهو مرتاح بعد) أن الكثير من المواضيع التي يتناولونها سياسية ... وبناء عليه نستطيع أن نقول أن طرحهم يوصف بأنه سياسي... ولا شك أنه يتكلمون كثيراً عن الموضوع الأقتصادي فبالتالي يمكن أن يوصف طرحهم بأنه أقتصادي... لكن لو تستخدم (دربيل10 ميجابيكسل) ما راح تشوف لهم أي طرح يتكلم عن قيم واخلاق المجتمع ... بل انهم يعتبرون مجرد الكلام عن هذا الموضوع يعتبر تعديا على خصوصيات الناس وتطرفاً ( وحجي فاضي ) ... اذن خلاصة القول بأن طرح الليبراليين يمكن أن يوصف بأنه سياسي... اقتصادي ... اللي تبي ....لكن بكل تأكيد .... طرح الليبراليين غير أخلاقي